पूरपरिस्थितीच्या पार्श्वभूमीवर SPPU च्या परीक्षा शुल्कवाढीला ABVP चा विरोध; आंदोलनाचा इशारा
सावित्रीबाई फुले पुणे विद्यापीठाच्या परीक्षा शुल्कात २० टक्के वाढ करण्यात आली असून सध्या महाराष्ट्रातील काही भागात भीषण पूरपरिस्थिती निर्माण झाली आहे. या ओल्या दुष्काळाच्या पार्श्वभूमीवर ही वाढ संपूर्णपणे अवाजवी आणि अन्यायकारक आहे.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाने शैक्षणिक वर्ष २०२५-२६ साठी परीक्षा शुल्कात २० टक्के वाढ करण्याचा निर्णय घेतला आहे. या निर्णयाला अखिल भारतीय विद्यार्थी परिषदेने तीव्र विरोध दर्शवला असून, ही शुल्कवाढ त्वरित रद्द करण्याची मागणी केली आहे. महाराष्ट्रातील काही भागांतील भीषण पूरपरिस्थितीच्या पार्श्वभूमीवर ही वाढ अन्यायकारक असून, पाच दिवसांत कार्यवाही न झाल्यास तीव्र आंदोलन करण्याचा इशारा अभाविपने दिला आहे.विद्यापीठाच्या परीक्षा व मूल्यमापन मंडळाचे संचालक डॉ. प्रभाकर देसाई यांना या मागणीचे निवेदन देण्यात आले.
विद्यापीठाच्या अधिकार मंडळाने २४ सप्टेंबर रोजी परीक्षा शुल्कात वाढ करण्याचा निर्णय घेतला. या निर्णयानुसार, आधीच अधिक प्रमाणात आकारण्यात येणाऱ्या छायांकित प्रत आणि पुनर्मूल्यांकन शुल्कामध्ये आणखी भर पडणार आहे. अभाविपने प्रसिद्धीपत्रक आणि परीक्षा संचालकांना दिलेल्या निवेदनात म्हटले आहे की, "राज्यातील अनेक जिल्हे ओल्या दुष्काळाचा सामना करत आहेत. अशा परिस्थितीत सामान्य घरातील विद्यार्थ्यांसाठी ही शुल्कवाढ अवाजवी आणि अन्यायकारक आहे. हा निर्णय म्हणजे विद्यार्थ्यांचे शैक्षणिक भवितव्य अंधारात ढकलण्याचा प्रकार आहे."
अभाविपने या शुल्कवाढीचा जाहीर निषेध करत, ती तात्काळ रद्द करण्याची मागणी केली आहे. " पुढील पाच दिवसांमध्ये सकारात्मक कार्यवाही न झाल्यास, अभाविप तीव्र स्वरूपाचे आंदोलन करेल," असा इशारा अभाविपचे पुणे महानगरमंत्री राधेय बाहेगव्हाणकर यांनी दिला आहे.
____________________________
सावित्रीबाई फुले पुणे विद्यापीठाच्या परीक्षा शुल्कात २० टक्के वाढ करण्यात आली असून सध्या महाराष्ट्रातील काही भागात भीषण पूरपरिस्थिती निर्माण झाली आहे. या ओल्या दुष्काळाच्या पार्श्वभूमीवर ही वाढ संपूर्णपणे अवाजवी आणि अन्यायकारक आहे. अभाविप या शुल्क वाढीचा निषेध करते. परीक्षा शुल्क वाढ ही या शैक्षणिक वर्षाकरिता तत्काळ रद्द करावी.
~ अथर्व कुलकर्णी (प्रदेश मंत्री, अभाविप)
