'फर्ग्युसन'मध्ये चार नवे अभ्यासक्रम सुरू; प्रवेश प्रक्रियेला सुरूवात

एज्युवार्ता न्यूज नेटवर्क 

महाराष्ट्रातील अग्रगण्य महाविद्यालयांपैकी एक असलेल्या पुण्यातील फर्ग्युसन महाविद्यालयाने (Ferguson College) चालु शैक्षणिक वर्षात चार नवीन अभ्यासक्रम सुरू (Four new courses launched)केले आहेत.प्राचीन भारतीय इतिहास, संस्कृती, पुरातत्वशास्त्र आणि डेटा सायन्स या दोन विषयांवरील पदवी अभ्यासक्रम तसेच डेटा जर्नालिझम आणि योगशिक्षकांसंदर्भातील दोन पदव्युत्तर पदविका (पोस्ट ग्रॅज्युएट डिप्लोमा) अभ्यासक्रम यांचा समावेश आहे,असे फर्ग्युसनचे प्राचार्य डॉ. श्याम मुडे (Ferguson Principal Dr. Shyam Mude) यांनी सांगितले. 

डॉ. श्याम मुडे, म्हणाले, भविष्यातील नव्या संधींच्या पार्श्वभूमीवर हे अभ्यासक्रम सुरु करण्यात आले असून विद्यार्थ्यांना अधिकाधिक रोजगाराभिमुख करण्याचे उद्दिष्ट आहे. डेटा जर्नालिझमवरील अभ्यासक्रमास कोणतीही पदवी पूर्ण केलेल्या विद्यार्थ्यास प्रवेश घेता येणार आहे. माध्यमांतील डेटा प्रोसेसिंगची वाढती गरज लक्षात घेऊन हा अभ्यासक्रम सुरु करण्यात आला असून अशा स्वरूपाचा भारतातील हा पहिलाच अभ्यासक्रम आहे. 

पुरातत्वशास्त्र आणि योग शिक्षकांसंदर्भातील अभ्यासक्रमांची रचनाही त्यांची वाढती मागणी आणि त्यातील कुशल मनुष्यबळाची कमतरता लक्षात घेऊन केली गेली असल्याचे उपप्राचार्य डॉ. राधिका जाधव यांनी यावेळी सांगितले. 

या चारही अभ्यासक्रमांची प्रवेश प्रक्रिया सुरु झाली असून इच्छुक विद्यार्थ्यांनी महाविद्यालयाच्या संकेतस्थळाला किंवा कार्यालयाला थेट भेट द्यावी,असे आवाहन प्राचार्य डॉ. श्याम मुडे यांनी यावेळी केले आहे.