ब्लॉकचेन क्षेत्रात करिअरची मोठी संधी; SPPU विद्यापीठात बी.एस्सी अभ्यासक्रमासाठी प्रवेश सुरू

एज्युवार्ता न्यूज नेटवर्क 

सावित्रीबाई फुले पुणे विद्यापीठामध्ये (Savitribai Phule Pune University) बी.एस्सी ब्लॉकचेन टेक्नोलॉजी या पदवी अभ्यासक्रमासाठी OEE (Online Entrance Exam) प्रवेश प्रक्रियेला सुरुवात झाली असून इच्छुक विद्यार्थ्यांसाठी ऑनलाइन अर्ज खुले करण्यात आले आहेत. २०२३ पासून सुरू झालेल्या या अभिनव अभ्यासक्रमाला विद्यार्थ्यांसह पालकांकडूनही उत्स्फूर्त प्रतिसाद मिळत आहे. यंदाच्या शैक्षणिक वर्षासाठी अर्ज करण्याची अंतिम तारीख १५ मे २०२६ असून इच्छुक विद्यार्थ्यांनी विद्यापीठाच्या अधिकृत संकेतस्थळावरून अर्ज करावेत, असे आवाहन करण्यात आले आहे.

 विद्यार्थ्यांना केवळ सैद्धांतिक शिक्षण न देता उद्योगाभिमुख प्रशिक्षणावर विशेष भर या अभ्यासक्रमातून  दिला जात आहे. मागील वर्षभरात Filecoin Foundation यांच्या सहकार्याने कार्यशाळा, Aptos Labs मार्फत बूटकॅम्प आणि हॅकेथॉन, तसेच Samsung च्या सहकार्याने पायथन विषयावरील हॅकेथॉनचे आयोजन करण्यात आले होते. या उपक्रमांमुळे विद्यार्थ्यांना प्रत्यक्ष उद्योग क्षेत्राचा अनुभव घेण्याची तसेच नव्या तंत्रज्ञानाची सखोल माहिती मिळण्याची संधी उपलब्ध झाली.

ब्लॉकचेन तंत्रज्ञान हे जागतिक स्तरावर झपाट्याने विकसित होणारे क्षेत्र मानले जात असून फायनान्स, सायबर सिक्युरिटी, हेल्थकेअर, सप्लाय चेन आणि गव्हर्नन्ससारख्या विविध क्षेत्रांत त्याचा मोठ्या प्रमाणावर वापर वाढत आहे. त्यामुळे या अभ्यासक्रमातून शिक्षण घेणाऱ्या विद्यार्थ्यांसाठी रोजगाराच्या अनेक संधी निर्माण होत आहेत. ब्लॉकचेन डेव्हलपर, स्मार्ट कॉन्ट्रॅक्ट इंजिनिअर, क्रिप्टो अ‍ॅनालिस्ट आणि डेटा सिक्युरिटी स्पेशालिस्ट यांसारख्या पदांवर देश-विदेशात करिअर करण्याची संधी उपलब्ध होत आहे.

यासोबतच स्टार्टअप संस्कृतीलाही चालना मिळत असून अनेक तरुण उद्योजक ब्लॉकचेन आधारित व्यवसाय उभारत आहेत. त्यामुळे विद्यार्थ्यांना नोकरीबरोबरच स्वयंरोजगार आणि उद्योजकतेच्या नव्या दिशा खुल्या होत आहेत.

अत्याधुनिक तंत्रज्ञान, उद्योगाभिमुख प्रशिक्षण आणि वाढत्या रोजगार संधींमुळे बी.एस्सी ब्लॉकचेन टेक्नोलॉजी हा अभ्यासक्रम विद्यार्थ्यांसाठी करिअरच्या दृष्टीने महत्त्वाचा पर्याय ठरत असल्याचे मत शिक्षण क्षेत्रातून व्यक्त करण्यात येत आहे.