'प्राध्यापक भरती'मुळे पुणे विद्यापीठाची दुर्दशा; रँकिंग घसरले, कुलगुरूंना दोषी ठरवले..

एज्युवार्ता न्यूज नेटवर्क

नुकत्याच जाहीर झालेल्या नॅशनल इन्स्टिट्यूशनल रँकिंग फ्रेमवर्कमध्ये (एनआयआरएफ) सर्वसाधारण गटात सावित्रीबाई फुले पुणे विद्यापीठाची (Savitribai Phule Pune University) ३७व्या क्रमांकाहून थेट ९१ व्या क्रमांकावर घसरण झाली. या सर्व प्रकारामुळे विद्यापीठाची प्रतिमा मलिन झाली असून, कुलगुरूंनी राजीनामा देण्याची मागणी होत आहे. मात्र, विद्यापीठात शिकवायला प्राध्यापकच (Professor recruitment) नसतील, तर कुलगुरू किंवा विद्यापीठ प्रशासन काय करणार यावर कोणीही बोलायला तयार नाही. सध्या विद्यापीठात प्राध्यापकांच्या ३८४ जागा मंजूर असून, त्यापैकी केवळ १४६ प्राध्यापक कार्यरत आहेत. निम्म्यापेक्षा अधिक म्हणजे २३८ जागा रिक्त (Professor vacancies) आहेत. त्यामुळे विद्यापीठाची दुर्दशा हे प्राध्यापक भरती अभावी झाली असल्याचे समोर आले आहे. 

त्यामागील एक-एक कारणे आता समोर येत आहेत. विद्यापीठातील प्राध्यापकांच्या एकूण ३८४ पदापैंकी २३८ प्राध्यापकांची पदे रिक्त आहेत. सध्या विद्यापीठात केवळ १० प्राध्यापक कार्यरत असून २२ सहयोगी प्राध्यापक आणि १२४ सहाय्यक प्राध्यापक असे एकूण १४६ जण प्रशिक्षणाचे काम करत आहेत. त्यामुळे विद्यापीठाचा शैक्षणिक दर्जा घसरला असल्याचे बोलले जात आहे. तसे विद्यापीठाने देखील स्पष्टीकरण दिले आहे.

रिक्त पदांची संख्या गेल्या दहा वर्षांत मोठ्या प्रमाणावर वाढली आहे. ही पदे भरण्यासाठीची कार्यवाही उच्च व तंत्रशिक्षण विभागाकडून संथ गतीने सुरू आहे. त्यातही १११ पदे भरण्याचीच मंजुरी देण्यात आली आहे. या प्रक्रियेमध्ये काही तांत्रिक बाबी उपस्थित झाल्याने, अजूनही भरती प्रक्रिया सुरूच आहे. विद्यापीठाने कंत्राटी पद्धतीने प्राध्यापकांची नेमणूक करून, गरज भागविण्याचा तात्पुरता प्रयत्न केला आहे.

प्राध्यापकांच्या संख्येसोबतच शिक्षकेतर कर्मचाऱ्यांची पदभरतीही काही वर्षांपासून झालेली नाही. शिक्षकेतर कर्मचाऱ्यांच्या १ हजार २३८ पदांपैकी ५८६ पदांवर कर्मचारी कार्यरत असून, ६५२ पदे रिक्त आहेत. परीक्षा विभाग आणि अनेक शैक्षणिक विभागांमध्ये कर्मचारीच नाहीत. या संपूर्ण परिस्थितीची उच्च व तंत्रशिक्षण विभागाला जाण असतानाही पदभरतीसाठी ठोस कार्यवाही होत नाही.