MIT विद्यापीठाची तब्बल अडीच कोटींची ऑनलाईन फसवणूक; पुणे विद्यापीठाच्या माजी कुलगुरूंच्या नावाचा वापर 

एज्युवार्ता न्यूज नेटवर्क 

पुण्यातील कोथरूड (Kothrud in Pune)भागातील नामांकित शैक्षणिक संस्था म्हणून ओळखल्या जाणाऱ्या एमआयटी विश्वशांती विद्यापीठाची (MIT World Peace University)तब्बल अडीच कोटी रुपयांची ऑनलाईन फसवणूक (Online fraud of Rs 2.5 crore) झाल्याची घटना घडली आहे. सावित्रीबाई फुले पुणे विद्यापीठाचे माजी कुलगुरू रघुनाथ शेवगावकर (Raghunath Shevgaonkar, former Vice Chancellor of Savitribai Phule Pune University)यांच्या नावाचा वापर करून एकाने तीन टप्प्यात तब्बल 2 कोटी 46 लाख रुपये विद्यापीठाच्या खात्यातून जमा करून घेत 'एमआयटी' ला गंडा घातला आहे, या प्रकरणी एमआयटी तर्फे सायबर पोलिसांकडे तक्रार दाखल करण्यात आली आहे.

एमआयटी विद्यापीठात मुख्य शैक्षणिक अधिकारी म्हणून काम करणाऱ्या डॉ. प्रसाद खांडेकर यांनी याप्रकरणी पोलिसांकडे फिर्याद दिली आहे. डॉ. चेथन कामथ या व्यक्तीच्या मोबाईलवरून एसएमएस प्राप्त झाल्यानंतर संबंधित फसवणुकीला सुरुवात झाल्याचे फिर्यादीमध्ये नमूद करण्यात आले. खांडेकर यांनी दिलेल्या फिर्यादीनुसार पुणे विद्यापीठाचे माजी कुलगुरू डॉ. रघुनाथ शेवगावकर यांच्या मोबाईल नंबर वरून एसएमएस प्राप्त झाला. त्यात रिसर्च फंडिंग अपॉर्च्युनिटी प्रोजेक्ट करिता डॉ. चेथन कामथ हा व्यक्ती संपर्क करेल, असे सांगितले. कामथ हा आयआयटी बॉम्बे येथील प्राध्यापक असल्याची माहिती दिली. त्याचप्रमाणे आयआयटी मुंबई येथे सोबत संशोधन प्रकल्पावर काम करण्यासाठी सांगितले. त्याचप्रमाणे शासनाकडून 28 कोटी रुपयांचा निधी ड्रोन प्रकल्पासाठी मंजूर झाल्याचे सांगितले. या प्रकल्पात सहभागी होण्यासाठी एमआयटी विद्यापीठाला एकूण मंजूर निधीच्या दोन टक्के निधी पुढील तीन तासांमध्ये भरावयास सांगितले. त्यावर मी विद्यापीठाचे अधिष्ठाता भरत काळे यांच्याशी याबाबत विचार विनिमय करून प्रकल्पाची खात्री पटल्यानंतर विद्यापीठाच्या खात्यातून सुरुवातीला 56 लाख रुपये जमा केले. काही दिवसांनंतर डॉ. चेथन कामथ याने माझ्याशी पुन्हा संपर्क करून आर्टिफिशियल इंटेलिजन्स हा शासनाचा 23 कोटी रुपयांचा प्रकल्प मंजूर झाल्याचे सांगितले. त्यानंतर 46 लाख रुपये विद्यापीठाकडून भरण्यास सांगितले. विद्यापीठाच्या वित्त विभागाशी संपर्क साधून ही रक्कम दिलेल्या अकाउंट मध्ये जमा करण्यात आली. त्यानंतर पुन्हा एकदा मशीन लर्निंग हा 72 कोटी रुपयांचा शासन  प्रकल्प मंजूर झाला असून त्यासाठी एक कोटी 44 लाख रुपये भरण्याबाबत सांगण्यात आले.विद्यापीठामार्फत ही रक्कमही दिलेल्या खात्यात जमा करण्यात आली.

डी.वाय. पाटील, एमआयटी, सिंहगडसह ३९ इंजिनिअरिंग काॅलेजची तपासणी; कॉलेजवर ऑब्झर्व्हरची नियुक्ती

विद्यापीठातर्फे सर्व रक्कम पाठवल्यानंतर या प्रकल्पाबाबत सामंजस्य करार करण्यासाठी कामथ याला 28 ऑगस्ट रोजी एमआयटी विद्यापीठामध्ये येण्यास सांगितले. त्याने ते मान्य केले.परंतु, 26 ऑगस्ट पासून त्याचा संपर्क होत नव्हता. त्याच्याकडून कोणताही प्रतिसाद मिळत नव्हता. त्यामुळे मी आयआयटी मुंबई येथून कामथ याचा नंबर घेऊन संपर्क साधण्याचा प्रयत्न केला. याबाबत विचारणा केली असता मला कोणत्याही प्रकल्पाबाबत कोणाशीही चर्चा केली नसल्याचे कामथ यांनी सांगितले. त्यावर माझी व विद्यापीठाची फसवणूक होत असल्याचे माझ्या लक्षात आले. त्यामुळे माझे सहकारी विद्यापीठाचे कुलसचिव गणेश शेळके यांच्याशी संपर्क साधून मी घडलेल्या प्रकाराची माहिती दिली. त्यावर सायबर पोलिसांकडे या संदर्भातील तक्रार देण्यात आली. एकूण विद्यापीठाचे 2 कोटी 46 लाख रुपयांची फसवणूक झाली असल्याचे यातून निष्पन्न झाले. त्यामुळे संबंधित खात्यात जमा केलेल्या व्यक्तीच्या नावे आणि डॉ. चेतन कामथ या व्यक्तीच्या नावे खांडेकर यांनी पोलिसांकडे फिर्याद दिली आहे.