दहावी पुरवणी परीक्षा अर्ज प्रक्रिया आजपासून; ‘ही’ तारीख अखेरची

एज्युवार्ता न्यूज नेटवर्क

दहावी पुरवणी परीक्षेसंदर्भात महत्वाची बातमी आहे. महाराष्ट्र राज्य माध्यमिक व उच्च माध्यमिक शिक्षण मंडळातर्फे (Maharashtra State Board of Secondary and Higher Secondary Education) जून-जुलै महिन्यामध्ये पुरवणी परीक्षेचे (supplementary examination) आयोजन करण्यात आले आहे. त्यासाठी अर्ज भरण्याची प्रक्रिया (application process) आजपासून दि. १५ मे सुरू करण्यात आली आहे. विद्यार्थ्यांना नियमित शुल्कासह २४ मेपर्यंत, तर विलंब शुल्कासह २९ मेपर्यंत अर्ज करता येणार आहे. राज्य मंडळाचे सचिव देविदास कुलाळ (State Board Secretary Devidas Kulal) यांनी प्रसिद्धीत्रकाद्वारे ही माहिती दिली.

बारावीच्या विद्यार्थ्यांसाठी पुरवणी परीक्षेसाठीची नोंदणी राज्य मंडळाने यापूर्वीच सुरू केली आहे. दहावीचा निकाल जाहीर झाल्यानंतर आता दहावीच्या विद्यार्थ्यांसाठी ही नोंदणी सुरू करण्यात आली आहे. त्यानुसार पुरवणी परीक्षेसाठी पुनर्परीक्षार्थी, खासगी विद्यार्थी, श्रेणी सुधारण्यास इच्छुक विद्यार्थी, तुरळक विषय घेऊन परीक्षा देणारे विद्यार्थी, आयटीआयचे विद्यार्थी यांना अर्ज भरता येणार आहे.

पुन्हा मुदतवाढ नाही

ऑनलाइन अर्ज भरताना फेब्रुवारी-मार्च २०२५ परीक्षेतील अनुत्तीर्ण विद्यार्थ्यांना त्यांची त्या परीक्षेतील माहिती अर्जात ऑनलाइन घेता येईल. श्रेणीसुधार विद्यार्थ्यांना जून-जुलै २०२५, फेब्रुवारी-मार्च २०२६, जून-जुलै २०२६ अशा तीन लगतच्या संधी उपलब्ध राहतील, नियमित आणि विलंब शुल्काने अर्ज भरण्याच्या तारखांना मुदतवाढ देण्यात येणार नाही, असे राज्य मंडळामार्फत स्पष्ट करण्यात आले आहे.

दरम्यान, राज्य मंडळाच्या बारावी परीक्षेचा निकाल नुकताच जाहीर करण्यात आला. त्यानुसार आता विद्यार्थ्यांना गुणपत्रिका, स्थलांतर प्रमाणपत्र, तपशीलवार गुण दर्शविणारे शालेय अभिलेख यांचे वाटप सर्व मान्यताग्रत उच्च माध्यमिक शाळा, कनिष्ठ महाविद्यालयांना १६ मे रोजी सकाळी अकरा वाजता करण्यात येणार आहे. त्यानंतर उच्च माध्यमिक शाळा, कनिष्ठ महाविद्यालयांनी त्याच दिवशी दुपारी तीन वाजता विद्यार्थ्यांना गुणपत्रिकांचे वाटप करण्याचे निर्देश देण्यात आले आहेत.